Šibihat leat guhton meahcabealde, ja dálvefuođđarat šibihiidda leat láddjejuvvon niittuin. Muorat leat njeidojuvvon boaldinmuorran, ávnnasin ja reaidun, darfi bordojuvvui boaldámuššan ja visttiide, ja urtasat ja muorjjit čoggojuvvojedje dállodollui.
Ittugáissát leat ain dehálaš guohtuneatnamat smávvašibihiidda buot njealji gielddas. Miehtá njárgga leat ain sávzadoalut, ja su. 15 000 sávzza luitojuvvojit meahcabeallai.
Sávzzat geassesajis váris. Govven: Oddrun Skjemstad
Jođus vulos Vuošvággái. Govven: Tine Marie Hagelin
Skog og landskap lea kárten šaddodaga ja guohtumiid eanaš osiin guohtuneatnamiin Ivgu suohkanis. Kárten konkludere ahte Ittugáissát leat okta dain árvvoleamos guohtunguovlluin Norggas. Guovllu oppalaš guohtunkvalitehta lea árvvoštallojuvvon leat hui buorre – buorre guohtun.
Sávzzat guhtot vuolládagas go dat luitojuvvojit miessemánus. Geassemánu rájes dassái go sávzzat čohkkejuvvojit fas, de eallit guhtot miehtá guovllu gáttis gitta gáissáid rádjai. Danne jáhkkimis oainnát sávzzaid go finat Ittugáissáin geasset. Danne lea hirbmat dehálaš ahte anát iežat beatnaga báttis, ja ahte giddet buot verráhiid.
Ivguheasta
Ivguheasta, maiddái nu gohčoduvvon Nordlándaheasta, lea okta golmma nationála norgga šlájain main lea hui dološ máddu. Sturrodaga dáfus dat lea okta dain unnimus šlájain, maidda muđui gullet dølaheasta ja jurán. Heastta máttut leat dološ davvinorgga heasttat mat ledje Ivguvuona birra, ja danne dat lea ožžon nama Ivguheastan.
Lea unnán diehtu Ivguheastta máttus, muhto lea oalle čielggas ahte šládja boahtá nuortan, Ruošša čađa, ja jáhkkimis gitta Ásias. Myhta mielde dat lei suorgi dán heastanális maid Djengis Khan ja su albmát geavahedje 1200–1300-logus.
Ivguheasta ii leat go sullii 130 centimehter alu ja rehkenastojuvvon heastan ponniluohkás. Dat lea maiddái dagahan ahte heasta guhká adnojuvvui heajos heastanállin. Aiddo fal heastta sturrodat, givrodat ja lodjivuohta dat dagahii ahte heivii nu bures šibitdoaluide Ivguvuonas. Heasta geavahuvvui bargguide oapmedálus, ja maiddái sáhtostallamii ja riidemii. Dat heive bures mátkeriidemii ja noađđeheastan go lea starggas vázzit ja jierbmái johtit váttes sajiin. Sturrodaga geažil lea álki heastta stivret, ja dat maiddái bargá seamma barggu go stuorra heasta. Heastta buori kvalitehta geažil vársát dávjá geavahuvvojedje lonuhangálvun Ivgobađa márkaniin.
Ivguheasta iežas rivttes sajis. Govven: Ellen Helsing