Suodjemeahcis leat máŋgga báikki gos vuhttojit dološ geavaheapmi, ja maid dálá boazodoallu ain geavahit. Vuhttojit dološ goahtesajit, bahčin- ja čohkkengárddit, lassin dálá gárddiide mat dál ain geavahuvvojit.

Eallu gárddis. Govven: John Ivar Larsen

Bohccot bohtet Gohppái cuoŋománus. Govven: Oddrun Skjemstad

Boazu guohtu veaiddalasas birra jagi ja guohtu dat mii luonddus lea iešguđet jagiáiggiin. Giđđat ja geasset boazu guohtu rahtá mii šaddá dađistaga go muohta suddá várregilggain. Geasset boazu manná badjosiidda vai beassá divrriin eret ja guohtut ráfis. Čakčageasi ja čakčat njiedjá vuolládagaide ja njoskkiide.

Boazu guohtu earret eará urtasiid, suoinni ja luktiid mat leat šaddan geasi áigge ja čakčat guobbariid. Boazu liiko hirbmadit jeahkálii, ja lea áidna ealli davviriikkalaš faunas mii dahká dan. Jeahkála lea álki suolbmudit, ja dat lea álbmái. Eará elliide lea jeagil mirkkolaš, ja bohccuin besset danne ráfis leaicidit dáid herskuid. Jeagil, biikajeagil, sarvájeagil ja fiskesjeagil mat šaddet eatnamis leat dehálepmosat, muhto ganat boares guosain ja sogiin leat maiddái dehálaččat, erenoamážit go leat heajos dálveguohtumat.

Čohkkemin ealu. Govven: Per Ivan Vatne

Bohccot Doaresvákkis. Govven: Oddrun Skjemstad

Go oainnát bohccuid

Lea erenoamáš vásáhus oaidnit ealu lahka.

  • Ane beatnaga báttis. Boazu sáhttá atnit ruohtti beatnaga uhkideaddji boraspiren mii lea bivdimin. Cuoŋománu 1.b. rájes gitta borgemánu 20.b. rádjai lea veaddingeatnegasvuohta. Ivgu suohkanis lea viiddiduvvon veaddingeatnegasvuohta gitta golggotmánu 15.b. rádjai. Báhccavuona suohkanis lea viiddiduvvon veaddingeatnegasvuohta gitta golggotmánu 31.b. rádjai. Maiddái veaddingeatnegasvuođaáiggi olggobealde lea dus geatnegasvuohta stivret beatnaga. Luovos beatnagat sáhttet vahágahttit fuođđuid ja maiddái sávzzaid ja bohccuid.
  • Garvve jus oainnát bohccuid guohtumin.
  • Čegŋe ja vuordde dassái bohccot leat mannan meattá jus eallu bođeš ovddal.
  • Giđđat lea boazu erenoamáš hearki, ja njiŋŋelasat guddet. Dalle mii fertet leat erenoamáš várrugasat: Bisán ja vuordde, jorgal ja garvve jus leaš dárbu!